科技轉移

[caption id=“attachment_15031” align=“aligncenter” width=“960”] 今次「HK Tech 300」參與包括學生、校友、研究人員，城大各個創業項目[/caption]

電腦J手記

本星期城大公佈撥出5億港元推行大型創新創業計畫「HK Tech 300」，擬3年內成立300間初創企業，平均每年推動100家初創；其他大學中人懷疑，有無咁多？

大學推動初創，原因之一係大學有唔少知識產權IP；據講城大注冊專利數量，更係全城最多，除咗城大學生創業，亦有不少研究計畫，亦可以商業化。雖然好多專利可能無乜價值，但300家創業則唔係無可能。

近年中大、科大、港大有唔少創業計畫，成功將大學IP研究，變成商業項目，城大推動類似項目，更多科研人員投入，有助提高城大研究氣氛。

今次「HK Tech 300」 鼓勵包括學生、校友、研究人員參與，甚至購買城大各項IP；城大各個創業項目，以往最有名氣可能係「水中銀」；今次城大介紹多個科究項目，不乏國際先進水平，甚至6G研究，大學排名不斷上升，可喜可賀。

以往大學IP商業轉化，必經科技轉移（Technology Transfer）部門，本港科技轉移最出色，可算香港科技大學，第一個案例，係經營互聯網項目嘅SuperNet，曾獲科技轉移處大力支持。而科大畢業生汪滔，創辦大疆創新舉世知名；李澤湘教授更可以講係科大嘅伯樂，除咗培養汪滔，亦提攜不少後進，有份創辦「香港X科技創業平台」，發掘唔少成功項目。

「HK Tech 300」鼓勵學生、校友、研究人員利用大學IP創業，並在過程給予支持，創科署向大學亦有TSSSU基金創業，加上各個創業園區支援初創，其實同時可申請多項資金，不過創業失敗機會相當高，即使有多個資金來源，亦唔一定成功。

科研人員開發IP，利用大學研究資源，以往大學傾向收取專利，結果有時太高，反不利研究人員創業。此外，大學科技轉移過程複雜，由教授創業成功率不高，近年大學透過兩個初創生態圈，幫手轉化大學科研，亦取得一定成功，亦推動轉移IP往商界。

大學主動加強科技轉移，理工大學據聞聘請科學園前高層過檔，城大亦已加強陣容，加強科技轉移能力，未來嘅IP轉移，應會愈來愈簡單。以前大學對IP價值估算，有時未必接近現實，從 IP到商業產品，又可能有一段長路要走。

[caption id=“attachment_15030” align=“alignleft” width=“283”] 「HK Tech 300」，擬3年內成立300間初創企業。[/caption]

城大率先主動鼓勵外間採用IP，又出書刊，介紹研究領域，如果收取費用合理，相信有更多人願意採用。本港大學研究質素高，大學鼓勵研究人員轉化IP創業，要畀研究人員更大自由度，轉移時唔好錙銖必較，莫講300家初創，3000家都有可能。