AI醫療第一股
Table Of Contents
電腦J手記
較早前本報報導有關推想醫療（InferVision）在歐盟選為醫院篩查Delta新冠肺炎的AI醫療方案，已通過中國證監處審核，成為首隻赴港上市AI醫療股，據報瑞銀、高盛、中信建投（國際）任保薦人，香港主板上市集資約三億美元。
過去幾年AI醫學影像有唔少初創，以人工智能深度學習及影像分析技術，分析MRI及CT等影像，幫助放射科診斷。近年放射科醫生嚴重缺人，即使有新儀器亦無法完全用盡，理論利用AI醫學影像可作初步篩選，減輕醫生工作量。不過放射科對於AI醫學影像接收比較緩慢，而且Covid-19推動幾家專做肺部AI醫學CT影像初創快速成長。
推想醫療在2016年成立，先後經過7輪融資，最後一輪包括高盛，也包括多家國家隊基金，最矚目係胸肺科產品；包括InferRead CT Lung和InferRead CT Pneumonia，亦係全球首家在中國、美國、歐盟和日本獲監管當局批准，多少拜疫情所賜。
InferRead CT Pneumonia獲歐盟委員會應用檢測2019冠狀病毒病，改善對Covid-19患者診斷及治療，今年亦開始取得盈利。
其實即使無新冠疫情發生，肺炎亦係致命疾病，可引致呼吸衰竭、敗血性休克昏迷等症狀，但肺炎成因繁多，細菌、病毒、真菌、分支桿菌以及寄生蟲等都導致肺炎，部分肺炎可能係自體免疫疾病，症狀輕微到嚴重，係香港第二位致命疾病。InferRead CT Pneumonia可分析肺炎病變，亦可用嚟診斷Covid-19。
推想另一項產品InferRead CT Lung，係首個獲國內NMPA肺結節醫療器械三類證，可以做肺結節良惡性分類。肺癌多數無甚癥狀，患上初期無乜感覺，早期難以診斷，發現時往往又係晚期，令致死率很高。臨床上早期診斷肺癌通常用CT電腦掃描，篩查肺部內嘅肺結節（Pulmonary nodules），肺結節通常指細過3㎝肺部陰影，但亦可以係良性病變，亦可以係早期肺癌。肺結節形態多樣，以肉眼分類可能走漏眼。InferRead CT Lung亦發現早期篩檢肺癌病變，肺癌可以病向淺中醫。
另一隻產品InferRead CT Stroke檢測中風產品，上月獲FDA嘅 510(k)批核，可在美國銷售，應該亦好快獲中國NMPA批核，診斷「腦內出血」（ICH），未來用於「缺血性中風」（Ischemic stroke），以及大血管閉塞導致急性缺血性中風。由於缺血性中風必須把握黃金3小時，所以InferRead CT Stroke發展缺血性中風，用途亦相當大。
但國內AI醫療正處於鞏固期，推想醫療今年第一季收入2213萬元人民幣。最近再獲融資包括數坤科技，今年再完成一筆7億元人民幣融資，AI醫療最重要係獲得證書，數坤科技嘅心臟產品冠脈狹窄AI成為首家獲得NMPA三類證後，又獲得歐盟MDR CE證書，成為了唯一獲得NMPA、CE雙證的冠脈AI。同時，數坤肺炎AI亦獲得歐盟MDR CE證書。不過有人歡喜，依圖上市不成後，旗下依圖醫療被深睿醫療收購，國內智慧醫療行業正汰弱留强。
香港亦有家博腦醫療科技（Brainnow），從中大醫學院衍生，正研發AccuBrain智能腦影像分析系統，幫助腦部早期檢測及早發現神經退化疾病，AccuBrain亦係獲NMPA肺結節醫療器械二類證，而亦獲得FDA嘅510(k)同埋CE認證，潛力唔錯，但可能離上市仍有一段距離。
